Nga klient biznesi te qindra mijëra euro nga buxheti publik: Përparim Rama kishte pasur marrëdhënie biznesore me Dukagjin Lipën para se të merrte drejtimin e Prishtinës. Pas zgjedhjes së tij si kryetar, Komuna nën udhëheqjen e tij ka vazhduar financimin e “Sunny Hill”, ndërsa dokumentet publike tregojnë se festivali është mbështetur me mbi 673 mijë euro nga buxheti i kryeqytetit në vetëm katër vite, raporton Spektatori.
Pas dritave të skenës, emrave botërorë dhe mijëra vizitorëve, festivali “Sunny Hill” ka edhe një histori tjetër: atë të parave publike, pronës komunale dhe një debati për konflikt të interesit.
Dokumentet e publikuara në platformën zyrtare të E-Prokurimit tregojnë se Komuna e Prishtinës, e udhëhequr nga kryetari Përparim Rama, ka ndarë edhe këtë vit 150 mijë euro për organizimin e festivalit.
Dokumentet tregojnë se kontrata “Organizimi i festivalit Sunny Hill – Bashkëfinancim me negocim” u nënshkrua më 31 korrik 2026, pikërisht në ditën kur nisi festivali. Përzgjedhja e operatorit është bërë përmes procedurës së negociuar pa publikimin e njoftimit për kontratë” ndërsa kriteri i dhënies së kontratës ishte çmimi më i ulët.
Festivali organizohet nga Dukagjin Lipa, themeluesi i “Sunny Hill” dhe babai i këngëtares me famë botërore Dua Lipa.
Por, përtej skenës dhe spektaklit, historia e “Sunny Hill” lidhet edhe me kontratat publike, përdorimin e pronës komunale dhe një proces të konfliktit të interesit që ka përfshirë kryetarin e Prishtinës, Përparim Rama.
Nga marrëdhënia biznesore te vendimet publike
Para se të merrte drejtimin e Komunës së Prishtinës, Përparim Rama kishte pasur një marrëdhënie biznesore me Dukagjin Lipën.
Sipas të dhënave të bëra publike, Rama, përmes kompanisë së tij “4M Group” në Londër, kishte ofruar shërbime profesionale për një projekt të lidhur me Dukagjin Lipën në Mbretërinë e Bashkuar.
Kjo marrëdhënie kontraktuale kishte nisur në vitin 2020 dhe kishte përfunduar në vitin 2022.
Pas përfundimit të kësaj marrëdhënieje, Rama, tashmë si kryetar i Prishtinës, u përfshi në vendimmarrje që lidhen me mbështetjen financiare të festivalit “Sunny Hill”, i cili organizohet nga kompania e Dukagjin Lipës.
Pikërisht kjo lidhje mes një raporti të mëhershëm biznesor dhe vendimeve të mëvonshme publike u bë objekt shqyrtimi nga Agjencia për Parandalimin e Korrupsionit.
Agjencia më 2 prill 2025 kishte vlerësuar se ekzistonin elemente të konfliktit të interesit, duke u bazuar në faktin se Rama kishte pasur një marrëdhënie kontraktuale me Dukagjin Lipën dhe më pas kishte marrë vendime si zyrtar publik që lidhen me subjektin e tij.
Për këtë çështje, APK-ja kishte vendosur që të iniciojë procedurën kundërvajtëse në gjykatë.
150 mijë euro të tjera për “Sunny Hill”
Pavarësisht debatit për konfliktin e interesit, Komuna e Prishtinës ka vazhduar financimin e festivalit “Sunny Hill”.
Vetëm në vitin 2026, kontrata e re publike kap vlerën prej 150 mijë eurosh. Por kjo nuk është hera e parë që buxheti i kryeqytetit mbështet këtë festival.
Në vitin 2025, Komuna e Prishtinës kishte ndarë 199 mijë euro për organizimin e “Sunny Hill”.
Në vitin 2024, ishte dhënë kontratë në vlerë prej 174 mijë e 900 eurosh për kompaninë “Sunny Hill” SH.P.K., shkruan Spektatori.
Ndërsa në vitin 2022, Komuna kishte ndarë edhe 150 mijë euro për festivalin.
Me kontratën e re të vitit 2026, vetëm këto katër financime publike arrijnë në 673 mijë e 900 euro.
Pra, në më pak se pesë vite, Sunny Hill është bërë një prej projekteve kulturore me mbështetjen më të madhe financiare nga Komuna e Prishtinës.
16.9 hektarë tokë komunale për 99 vjet
Mbështetja institucionale për “Sunny Hill” nuk është kufizuar vetëm në kontrata financiare. Në vitin 2023, Komuna e Prishtinës dhe organizatorët e festivalit arritën marrëveshje për shfrytëzimin e një hapësire komunale në Bërnicë të Poshtme.
Bëhet fjalë për rreth 16.9 hektarë tokë komunale, e dhënë në shfrytëzim për një periudhë prej 99 vitesh. Sipas marrëveshjes, organizatorët e “Sunny Hill” ishin zotuar për një investim prej rreth 6.6 milionë eurosh në këtë hapësirë brenda një periudhe pesëvjeçare.
Projekti parashihte krijimin e një hapësire të dedikuar për zhvillimin e festivalit, por edhe për aktivitete të tjera gjatë vitit.
Marrëveshja për shfrytëzimin afatgjatë të tokës publike u shoqërua me debat për kushtet, kohëzgjatjen e saj dhe raportin mes një institucioni publik dhe një organizimi privat.
Kështu, përveç qindra mijëra eurove të ndara përmes kontratave publike, “Sunny Hill” është bërë pjesë e një marrëdhënieje më të gjerë me Komunën e Prishtinës: financim nga buxheti komunal, shfrytëzim afatgjatë i pronës publike dhe zotim për investime miliona euroshe.
“Festivali që solli botën në Prishtinë”
Festivali “Sunny Hill” u mbajt për herë të parë në Prishtinë në vitin 2018, ndërsa u rikthye edhe në vitin 2019. Edicioni i vitit 2020 u anulua për shkak të pandemisë së koronavirusit.
Në skenën e festivalit ndër vite janë ngjitur disa prej emrave më të mëdhenj të muzikës botërore, përfshirë Miley Cyrus, Dua Lipa, Katy Perry, Calvin Harris, Martin Garrix, Action Bronson, Keinemusik, Bebe Rexha dhe shumë artistë të tjerë ndërkombëtarë.
“Sunny Hill” e ka vendosur Prishtinën në hartën e festivaleve ndërkombëtare të muzikës dhe ka sjellë mijëra vizitorë në kryeqytet.
Por dokumentet publike tregojnë edhe një anë tjetër të kësaj historie: një festival i organizuar nga një subjekt privat, i cili është mbështetur me qindra mijëra euro nga buxheti i Prishtinës, ka siguruar shfrytëzim afatgjatë të një prone komunale dhe është shoqëruar me një proces për konflikt të interesit.
Pavarësisht procedurës gjyqësore për konfliktin e interesit, financimi publik për “Sunny Hill” ka vazhduar, duke e çuar mbështetjen nga Komuna e Prishtinës në mbi 673 mijë euro vetëm për katër vitet e fundit./Spektatori.com
