Kryetari i Lidhjes Demokratike të Kosovës (Lidhja Demokratike e Kosovës), Lumir Abdixhiku, ka reaguar ashpër ndaj kryetarëve të degëve të partisë në Pejë dhe Lipjan, pas kërkesave të tyre për dorëheqjen e tij pas rezultatit të zgjedhjeve të 7 qershorit.
Në një postim në Facebook, Abdixhiku iu është përgjigjur Gazmend Muhaxherit dhe Imri Ahmetit, duke thënë se kërkesat për dorëheqje “do të ishte më korrekte” të bëheshin “ballë për ballë” dhe jo përmes mediave.
“Si nuk u ngopën kurrë?!”, ka shkruar Abdixhiku në fillim të reagimit të tij, teksa Muhaxherin e Ahmetin, i ka cilësuar si ‘sabotues të qëllimshëm’.
Ai pranoi se rezultati zgjedhor në Pejë dhe Lipjan nuk ka qenë i kënaqshëm, duke shtuar se fakti që LDK në disa komuna ku qeveris ka dalë e treta tregon, siç u shpreh ai, “dozën e një sabotimi të thellë dhe të një projekti që nuk është i LDK-së”.
Duke iu referuar çështjes së dorëheqjes së tij, Abdixhiku tha se ajo është trajtuar më herët në Kuvendin e 31 janarit dhe se, sipas tij, anëtarësia e partisë “ka folur qartë”.
Në të njëjtën kohë, ai kërkoi dorëheqje morale nga dy kryetarët e degëve, duke i lidhur ato me performancën zgjedhore në komunat përkatëse.
Abdixhiku gjithashtu paralajmëroi kundër, siç i quajti ai, “projeketeve për ndarje të LDK-së”, duke thënë se ato kanë dështuar më herët dhe do të dështojnë sërish.
“LDK nuk është konfederatë e interesave lokale… LDK mbetet parti nacionale,” shkroi ai, duke shtuar se nuk do të lejojë ndryshimin e vullnetit të shumicës brenda partisë.
Në fund të reagimit në Facebook, ai u bëri thirrje anëtarëve të partisë të ruajnë qetësinë, duke theksuar se partia do t’i kalojë sfidat e brendshme.
