Komuna e Podujevës, e udhëhequr nga kryetari Shpejtim Bulliqi i Lëvizjes Vetëvendosje, ka nënshkruar një kontratë 12-mujore në vlerë 48,300 euro me televizionin lokal “TV LLAPI” për organizimin dhe transmetimin e aktiviteteve komunale.
Sipas të dhënave të publikuara në platformën E-Prokurimi, kontrata mban titullin “Organizimi i aktiviteteve kulturore” dhe është lidhur më 17 qershor 2026, përmes një procedure të hapur prokurimi ku kriter vlerësimi ka qenë çmimi më i ulët.
Megjithatë, sipas dokumenteve zyrtare, në garë ka marrë pjesë vetëm një operator ekonomik, TV Llapi, i cili edhe është shpërblyer më pas nga pushteti i LVV-së, raporton Spektatori.
Vlera finale e kontratës prej 48,300 eurosh është më e lartë se parashikimi fillestar i komunës prej 40,000 eurosh. Marrëveshja është kontratë publike kornizë me çmim njësi dhe parashikon “devijim të lejuar të sasisë deri në ±30%”.
Sipas dosjes së tenderit, TV LLAPI obligohet të kryejë një gamë të gjerë shërbimesh që përfshijnë transmetimin e drejtpërdrejtë të seancave të Kuvendit Komunal, debateve publike dhe dëgjimeve qytetare, si dhe mbulimin e manifestimeve kulturore dhe ngjarjeve të tjera komunale.
Dokumentacioni i tenderit parashikon gjithashtu prodhimin e videove dhe spoteve promovuese për komunën, ku kërkohet vendosja e logos zyrtare në fillim, gjatë dhe në fund të materialeve, si dhe përfshirja e saj në transmetime.
Po ashtu, kontrata përfshin edhe shërbime teknike për aktivitete publike për nevojat e Drejtorisë së Kulturës, Rinisë dhe Sportit. Tenderi është iniciuar më 4 maj 2026 dhe është finalizuar me një ofertë të vetme të pranuar.
Mediumi “TV LLAPI”, sipas të dhënave nga Agjencia e Regjistrimit të Bizneseve të Kosovës (ARBK), është regjistruar në vitin 2017 dhe figuron në pronësi të kompanisë “VISION TV”, e cila udhëhiqet nga Rozafat, Murat dhe Besfort Maloku.
Në një raportim nga VOX Kosova më 19 qershor, Ministria e Punëve të Brendshme, e udhëhequr nga Xhelal Sveçla, ka nënshkruar një kontratë në vlerë 522 mijë euro me kompaninë “Telkos”, e ndarë në dy lote për shërbime interneti. Kompania “Telkos” është pronare e televizionit “TëVë1”./Spektatori.com
