Bashkimi Evropian ka hapur një hetim ndaj Google lidhur me përmbledhjet e inteligjencës artificiale (IA) që paraqiten mbi rezultatet e kërkimit.
Komisioni Evropian njoftoi se do të vlerësojë nëse kompania ka përdorur të dhëna nga faqet e internetit për të ndërtuar këtë shërbim dhe nëse ka dështuar të ofrojë “kompensim të përshtatshëm” për botuesit, raporton BBC, transmeton Spektatori.
Hetimi pritet të shqyrtojë edhe mënyrën se si videot në YouTube mund të jenë shfrytëzuar për të trajnuar sistemet më të gjera të IA-së së Google-it, si dhe nëse krijuesve të përmbajtjes u është dhënë mundësia të përjashtohen nga kjo procedurë.
Një zëdhënës i Google paralajmëroi se hetimi “rrezikon të pengojë inovacionin në një treg që është më konkurrues se kurrë”.
“Evropianët meritojnë të përfitojnë nga teknologjitë më të fundit dhe ne do të vazhdojmë bashkëpunimin e ngushtë me industrinë e lajmeve dhe atë krijuese ndërsa ato përshtaten me epokën e IA-së”, tha ai.
Hetimi i BE-së do të përfshijë gjithashtu Modalitetin e IA-së të Google, i cili u ofron përdoruesve përgjigje në stil bisedor, të shoqëruara me disa lidhje të jashtme.
Ky shërbim vjen si shtesë ndaj platformës ekzistuese të kërkimit të gjigantit të teknologjisë, duke ofruar një përvojë të ngjashme me rivalë si ChatGPT.
