Për shumë njerëz, përshtatja e stërvitjes gjatë ditës është e vështirë, duke lënë mëngjesin ose mbrëmjen si opsionet kryesore. Por cila kohë është më e mirë për gjumin dhe nivelet e energjisë? Ekspertët kanë mendime të ndryshme, raporton Spektatori.
Sipas Health, aktiviteti fizik në mëngjes mund të ndihmojë në ruajtjen e një orari më të rregullt. Arsenio Paez, shkencëtar dhe drejtor ekzekutiv i Shoqërisë Kanadeze të Gjumit, thotë se ushtrimet e mëngjesit mbështesin një aspekt kyç të gjumit të mirë: rënien më të shpejtë në gjumë.
Ushtrimet e mëngjesit, veçanërisht ato që kryhen jashtë, ndihmojnë në stimulimin e çlirimit të melatoninës – hormoni që rregullon orën biologjike dhe sinjalizon trupin për çlodhje pas errësirës. Të biesh më shpejt në gjumë shpesh lidhet me pushim më cilësor dhe nivele më të mira energjie gjatë ditës.
Për më tepër, ushtrimet rrisin energjinë duke përmirësuar qarkullimin e gjakut dhe aktivitetin mitokondrial në qelizat muskulore, ndërsa çlirimi i endorfinave jep një nxitje natyrale mendore për ta nisur ditën më pozitivisht.
Megjithatë, Scott Kutscher, profesor i mjekësisë së gjumit në Universitetin Stanford, paralajmëron se zgjimi shumë herët për të ushtruar mund të ketë efekte negative nëse prish gjumin dhe nuk kompensohet me pushim të mjaftueshëm gjatë natës.
Nga ana tjetër, ekspertët theksojnë se stërvitja e lehtë në mbrëmje ka përfitimet e veta. Sipas specialistëve të mjekësisë sportive, aktiviteti i lehtë në orët e vona mund të ndihmojë në uljen e stresit dhe ankthit të akumuluar gjatë ditës, duke krijuar një gjendje qetësie para gjumit.
Paez shton se aktiviteti i moderuar në mbrëmje mund të përmirësojë cilësinë e gjumit dhe të reduktojë zgjimet gjatë natës. Megjithatë, stërvitjet intensive shumë afër orarit të gjumit – brenda një ore – nuk rekomandohen, pasi rrisin temperaturën e trupit dhe stimulojnë sistemin nervor, duke e bërë më të vështirë relaksimin.
Studimet mbi këtë temë mbeten të përziera. Disa sugjerojnë se ushtrimet intensive në mbrëmje nuk e dëmtojnë domosdoshmërisht gjumin, madje mund të përmirësojnë perceptimin subjektiv të cilësisë së tij ose të zgjasin kohëzgjatjen totale të gjumit.
Në fund, ekspertët pajtohen se ndikimi i ushtrimeve në gjumë dhe energji varet nga faktorë individualë si lloji i ushtrimeve, zakonet e gjumit dhe të ushqyerit. Sipas Kutscher, dallimet mes ushtrimeve të mëngjesit dhe atyre të mbrëmjes janë minimale në aspektin statistikor.
“Gjëja më e rëndësishme nuk është kur ushtroheni, por që ta bëni këtë në mënyrë të rregullt. Synoni të paktën 150 minuta ushtrime me intensitet të moderuar në javë”, thekson Riederer.
Pra, qoftë në mëngjes apo në mbrëmje, konsistenca mbetet çelësi për gjumë më të mirë dhe energji më të lartë,
