Rezultatet preliminare të zgjedhjeve të dhjetorit 2025 tregojnë ndryshime të dukshme në raportin e forcave politike në Kosovë, krahasuar me zgjedhjet e vitit 2021 dhe ato të shkurtit 2025, raporton Spektatori.
Sipas të dhënave të paraqitura në grafikët fillestarë, Lëvizja Vetëvendosje (LVV) vazhdon të mbetet subjekti politik më i votuar në vend, me rreth 50.28 për qind të votave. Kjo shifër konfirmon epërsinë e saj ndaj partive të tjera, ndonëse shënon luhatje të lehta krahasuar me ciklet e kaluara zgjedhore.
Në zgjedhjet e fundit, LVV kishte fituar 42.3 për qind të votave, ndërsa në zgjedhjet e 28 dhjetorit 2025 ka arritur ta rikthejë ndjeshëm rezultatin e vitit 2021, duke forcuar pozitën e saj si forcë dominuese politike.
Partia Demokratike e Kosovës (PDK) shënon rritje në këto zgjedhje, duke arritur në rreth 21 për qind. Ky rezultat është më i lartë krahasuar me 17.01 për qind në vitin 2021 dhe 20.95 për qind në zgjedhjet e shkurtit 2025, duke e konfirmuar PDK-në si forcën e dytë politike në vend.
Në anën tjetër, Lidhja Demokratike e Kosovës (LDK) shënon rënie të ndjeshme krahasuar me zgjedhjet e shkurtit 2025. Nga 18.27 për qind, ajo bie në rreth 13.57 për qind, megjithëse ky rezultat mbetet mbi atë të vitit 2021, kur kishte siguruar 12.73 për qind të votave.
Aleanca për Ardhmërinë e Kosovës (AAK) vazhdon trendin rënës, duke zbritur në rreth 5.68 për qind në zgjedhjet e dhjetorit 2025, nga 7.06 për qind në shkurt dhe 7.12 për qind në zgjedhjet e vitit 2021.
Ndërkohë, Lista Serbe shënon një rritje të lehtë me rreth 4.78 për qind, krahasuar me 4.26 për qind në shkurt 2025, por mbetet nën rezultatin e vitit 2021, kur kishte marrë 5.09 për qind.
Këto të dhëna pasqyrojnë një skenë politike ende të polarizuar, me Vetëvendosjen që ruan primatin, PDK-në që konsolidon rritjen dhe partitë e tjera që përballen me sfida serioze për të rifituar besimin e elektoratit.
Komisioni Qendror i Zgjedhjeve pritet të publikojë rezultatet përfundimtare pas përfundimit të numërimit të të gjitha votave.
